युनियन लिडरको  सूचिमा निरौला

न्यु ह्याम्प्शायर राज्यको एउटा चर्चित पत्रिका “युनियन लिडर”को वर्ष २०१६ ‘फोर्टी अन्डर फोर्टी’ को सूचिमा भूटानी समुदायका तिलक निरौला  समावेश भएका छन् । उक्त पत्रिकाले भर्खरै घोषणा गरेको सूचीमा ४० वर्ष मुनिका ४० जना सफल युवा पारखीहरुको नाम सार्वजनिक गरिएको छ |tilak

हरेक वर्ष समाजमा महत्वपूर्ण योगदान पुऱ्याउने व्यक्तिहरुको नामावली संकलन गर्दै आएको यस पत्रिकाले यस वर्ष भूटानी समुदायलाई पनि समावेश गरेको छ ।

भूटानको तक्लाई ब्लकमा जन्मिएर तीन वर्षको हुँदा सपरिवार देशनिकाला भएका थिए तिलक । पिता खडानन्द र माता पारवतीका कान्छा छोरा तिलक सानै छँदादेखि सामाजिक कार्यमा लागेका थिए । दुइ दिदी-बहिनी र दुई दाजुहरूको वात्सल्यमा हुर्केका तिलकलाई अन्य सदस्यभन्दा चम्किलो ताराका रुपमा लिन्छन् उनका परिवारजन ।

अभावै अभावमा खट्केको शरणार्थी अवस्थामा पनि अरुलाई सेवा दिने काममा लागिरहे तिलक । गोल्धाप शरणार्थी शिविरमा सोसियल ह्वेल्फेयर कमिटी नामक संस्थाका प्रणेता तिलकले भूटान समाचार सेवाको समाचार संयोजक रहेर लामो समय काम गरेका छन् ।

शिविरमा युवा केन्द्र (YFC) को सामाजिक संयोजक भएर युवाहरूमा देखिएका कतिपय समस्याहरूको हल खोजे र युवाहरूलाई बिभिन्न तालिम पनि दिलाए ।

२०१३ सालमा अमेरिका पुनर्वास भएका निरौला हाल पनि भूटानी समाज न्यु ह्याम्प्शायरका संचार  सम्योजक हुन् । ककंर्ड टिभीमार्फत नेपाली भाषामा “हाम्रो आवाज” नामक कार्यक्रम सञ्चालन गर्ने उनी पहिलो नेपालीभाषी हुन् ।  यसै गरि तिलक निरौला न्यु ह्याम्प्षरमा दर्ता भएको भुटान मिडिया सोसाइटीको निर्देशक मण्डली सदस्य पनि हुन् |

युनियन लिडर पत्रिकाका अनुसार आगामी मार्च १५ मा हुने कार्यक्रममा निरौला लगायत न्युह्याम्प्षर राज्यका ४० वर्ष मुनिका ४० जनालाइ यो सम्मान प्रदान गरिने छ |